फुल्चोकीमा हिउँ हेरेर फर्किदा हराएका बालक एकसातापछि भेटिए

काठमाडौं । ललितपुरको फुल्चोकीमा हिउँ हेरेर फर्किने क्रममा एक साता अघि हराएका १७ वर्षीय बालक सकुसल भेटिएका छन् ।

ललितपुरको थसिखेलस्थित अजय शिशू सदनमा अध्ययनरत जोन तामाङ गत बिहीबार फुल्चोकीमा हिउँ हेरेर फर्किदा हराएका थिए । उनी विद्यालयका प्रिन्सिपलसहित ५ र ६ कक्षाका ११ विद्यार्थी हिउँ हेर्न गएका थिए ।

तामाङलाई फुल्चोकी जंगलबाट सकुशल भेटिएको प्रहरीले जनाएको छ । उनलाई आफन्तले नै खोजी गर्ने क्रममा भेटाएका थिए । प्रिन्सिपलको लापरवाहीले यस्तो घटना भएको अभिभावकको आरोपपछि प्रहरीले विद्यालयका प्रिन्सिपल दुर्गाबहादुर ओलीलाई समेत नियन्त्रणमा लिएको थियो ।