देशभरका १६ हजार युवालाई व्यावसायिक तालीम दिइने

काठमाडौँ । व्यावसायिक शिक्षा तथा तालीम अभिवृद्धि परियोजना इभेन्टले यस वर्ष देशभरिका १६ हजार युवालाई व्यावसायिक तालीम दिने भएको छ ।

आर्थिकरुपमा विपन्न युवालाई परिचान गरी उपत्यकाका ४ हजारसहित मुलुकका १६ हजार युवालाई व्यावसायिक तालीम दिन थालिएको परियोजनाका निर्देशक टेकनारायण पाण्डेले जानकारी गराए ।

परियोजनाले १६ देखि ४० वर्ष उमेर समूहका युवालाई तीन महिनाको उक्त तालीम दिन थालेको हो । “बेरोजगार युवालाई स्वरोजगार बनाउनका लागि तालीम सञ्चालन गर्न थालिएका हौँ” उनले भने, “तालीमपश्चात उनीहरुको सीप परीक्षणसमेत गरिने छ ।”

परियोजनाले प्राविधिक शिक्षा तथा तालीम परिषद् सिटीइभिटीबाट सम्बन्धन प्राप्त संस्थामार्फत तालीम दिइने छ । इलेक्ट्रसियन, अटोमोबाइल, मोबाइल, भेटनरी, सिलाइकटाइ तथा व्यावसायिक कृषि तालीम प्रदान गर्ने परियोजनाका उपसचिव सुजनराज खनालले बताए ।

उनले परियोजनाले राष्ट्रियस्तरको पत्रिकामा सूचना निकालेर त्यस्ता समूहका युवालाई तालीमका लागि आह्वान गर्ने बताए । सूचना निस्केपछि आफूले चाहेको विषयमा तालीम लिनका लागि दरखास्त दिन सक्ने छन् ।

दरखास्त दिएकालाई गरिबी सूचांकको आधारमा तालीममा समावेश गराइने छ । तालीम यही फागुन महिनादेखि सञ्चालन हुनेछ । एक जनाका लागि १८ हजार २ सय देखि २२ हजार २ सय सम्म खर्च हुने खनालले बताए ।