हिउँ हटाइ यातायात सेवा सञ्चालन

हेटौँडा । त्रिभुवन राजपथको दामन र सिमभञ्ज्याङमा बुधबार अपराह्न परेको हिउँ हटाइ आज बिहानदेखि हेटौँडा–काठमाडौँको यातायात सेवा सञ्चालनमा ल्याइएको छ ।

हिमपातले गर्दा हिजै साँझ ५ बजेदेखि यातायात सेवा अवरुद्ध भएको थियो । सडक डिभिजन कार्यालयका प्राविधिकले नून र बालुवा बिछ्याउँदै हिउँ हटाएको प्रमुख जिल्ला अधिकारी चक्रबहादुर बुढाले जानकारी दिए ।

हेटौँडादेखि काठमाडौँ र काठमाडौँदेखि हेटौँडातर्फ जाने सयौँ यात्रु हिजो साँझदेखि नै दामन र सिमभञ्ज्याङमा अलपत्र अवस्थामा रहनुपरेको थाहा नगरपालिकाका प्रमुख लवशेर विष्टले बताए ।

यात्रु राजमार्ग खुलेसँगै हेटौँडा र काठमाडौँतर्फ लागिसकेको पालुङ इलाका प्रहरी कार्यालयले जनाएको छ । हिउँ करिब दुई फिट बाक्लो परेको प्रहरीले जनाएको छ ।