उपप्रधानमन्त्री गच्छदार भन्छन्, बिहीबार प्रदेश प्रमुख र अस्थायी केन्द्र तोकिन्छ

विराटनगर । अस्थायी राजधानी नतोकिँदा कडा आलोचना खेप्दै आएको सरकारले आगामी विहीबार सबै प्रदेशमा प्रमुख तोक्ने भएको छ ।

उपप्रधानमन्त्री एवं स्थानीय विकास मन्त्री विजयकुमार गच्छदारले आगामी बिहीबार बस्ने मन्त्रिपरिषद्को बैठकले प्रदेश प्रमुख र प्रदेशको अस्थायी केन्द्र तोक्ने बताएका छन् ।

हालसम्म सरकारले सबै प्रदेशमा प्रदेश प्रमुख र प्रदेशको अस्थायी केन्द्र तोक्न सकेको छैन । प्रदेश केन्द्र र प्रदेश प्रमुख नतोक्दा निर्वाचन अयोगले समेत निर्वाचन परिणाम वुझाउन नसकेको गुनासो गर्दै आएको छ ।

आइतवार विराटनगर आइपुगेका उपप्रिधानमन्त्री गच्छदारले राष्ट्रिय पार्टीहरुबीच न्यूनतम सहमति गरेर मात्रै प्रदेश प्रमुख र प्रदेशको अस्थायी केन्द्र तोकिने बताए । ‘दलहरुबीच सहमति भन्नु नै भागभण्डा हो, योग्य र राम्रो व्यक्तित्व भएका व्यक्तिलाई प्रदेश प्रमुखमा नियुक्ति गरिनेछ’ उनले भने, ‘त्यसका लागि सबै दलसँग न्यूनतम सहमतिको खोजी भइरहेको छ ।’

दलहरुबीच सहमति कायम हुन नसकेमा वर्तमान सरकारले विधिसम्मत रुपमा प्रदेश प्रमुख तोक्ने उनले बताए । उनले भने, ‘विधिसंगत ढंगले नियुक्त गरिने प्रदेश प्रमुखलाई पूर्वग्राही ढङ्गबाट अब बन्ने सरकारले हटाउन सक्दैन ।’