संविधान संशोधन नभए पुनः सडक आन्दोलन गर्ने

राजविराज । मधेशी नेताहरुले संविधान संशोधन नभए पुनः सडक आन्दोलन गर्ने चेतावनी दिएका छन् ।

मधेशी एशोसिएशन इन अमेरिका (मा) नामक संस्थाले शनिवार राजविराजमा आयोजना गरेको शहीद परिवारलाई सम्मान तथा नवनिर्वाचितलाई शुभकामना र बधाई कार्यक्रम राष्ट्रिय जनता पार्टी नेपालका अध्यक्ष मण्डलका सदस्य राजेन्द्र महतोले संविधान संशोधन नगरे फेरि सडक आन्दोलन गर्ने चेतावनी दिए ।
उनले मधेश गठबन्धनले निर्वाचनमा मधेशी जनताको जनादेश पाएकाले मधेशी सांसदहरुले संविधान संशोधनलाई पहिलो प्राथमिकतामा राखेको बताए ।

मधेशी जनताको जनादेशले छ मधेशवादी दललाई एकै छातामुनि ल्याएको भन्दै महतोले निर्वाचनको परिणाम कुनै दलको नभएर मधेशी जनताको भएको जिकिरसमेत गरे । उनले मधेशी जनताले दिएको जनाधिकारको तीन ठूला दलले समेत स्वीकार गरी संविधान संशोधन गर्नुपर्ने बताए ।

सो अवसरमा मलेठ घटनामा ज्यान गुमाएका व्यक्तिका परिवारलाई सम्मान गरिएको थियो ।