मंसिर १० को निर्वाचन सर्न सक्छ : कानूनमन्त्री

काठमाडौं । प्रमुख प्रतिपक्ष दल नेकपा एमाले सहितका दलहरुले सरकारले निर्वाचन सार्न खोजेको आरोप लगाइरहँदा सरकारका एक मन्त्रीले १० मंसिरमा हुने निर्वाचन सर्नसक्ने संकेत गरेका छन् ।

कानुन, न्याय तथा संसदीय मामिलामन्त्री यज्ञबहादुर थापाले मंसिर १० गतेको निर्वाचन सर्नसक्ने संकेत गरेका हुन् । मन्त्री थापाले १० गते हुने निर्वाचनको मिति तलमाथि हुने तर, मंसिर २१ गतेको निर्वाचन तलमाथि नहुने स्पष्ट पारे ।

बुधबार रिपोर्टर्स क्लब नेपालले आयोजना गरेको कार्यक्रममा मन्त्री थापाले मंसिर १० मा तोकिएको निर्वाचन सर्न सक्ने संकेत गरे । मन्त्री थापाले विकसित राजनीतिक अवस्थाका कारण मंसिर १० गते तोकिएको निर्वाचन मंसिर २१ गते सर्न सक्ने जनाएका हुन् ।

केन्द्र र प्रदेश सभाको निर्वाचन एकैचोटि गर्ने गृहकार्य भइरहेको बताउँदै मन्त्री थापाले प्रतिपक्षलाई सरकारका गतिविधिलाई साथ दिनको लागि समेत आग्रह गरे । उनले भने, ‘प्रतिपक्षले सरकारलाई सहयोग गर्नुपर्छ, शंका गरेर हुँदैन । निर्वाचन हुँदैन कि, सरकारले निर्वाचनको मिति सार्छ कि ? भनेर शंका गरेको छ, विगतका निर्वाचनमा पनि एमाले शंका गरेको थियो, सरकारले त्यो शंकालाई व्यर्थ सावित गरिदिएको थियो ।’