विशालनगरस्थित मोटरसाइकल ग्यारेजमा आगलागी

काठमाडौं । विशालनगरस्थित एक मोटरसाइकल ग्यारेजमा आगलागी भएको छ।मोटरसाइकल वर्कशपमा आगलागी हुँदा मर्मतका लागि ल्याइएका पाँच वटा मोटरसाइकल, ९० वटा मोटरसाइकल ट्याङकी र दुई ‘कम्प्रेसन’ मेसिन जलेर नस्ट भएका छन् । 

कामनपा–५ स्थित शम्भु शाहीले सञ्चालन गरेको ‘शङकर अटो वर्कशप’मा सोमबारसाँझ ५ः४५ बजे आगलागी हुँदा ती धनमाल जलेर नष्ट भएको महानगरीय प्रहरी बृत्त कमलपोखरीले जानकारी दिएको हो ।

उपत्यकाका तीन वटा दमकल र प्रहरीको टोलीले एक घण्टापछि आगो निभाएको थियो । महानगरीय प्रहरी परिसर काठमाडौँका प्रवक्ता एवं प्रहरी नायब उपरीक्षक मोहनकुमार थापाले आगलागीमा मोटरसाइकलका पाटपुर्जा जलेर रु १० लाखबराबरको क्षति भएको जानकारी दिए ।

आगलागीमा वर्कशप नजिकै रहेको कवाडी पसलको आधा भागसमेत जलेको छ । सामान मर्मतको क्रममा कम्प्रेसन मेसिनबाट आगो सल्किएको प्रहरीले जनाएको छ ।