ठाउँठाउँमा पहिरो खस्दा नारायणगढ–मुग्लिन अवरुद्ध

काठमाडौं । निरन्तर वर्षापछि पहिरो खस्दा नारायणगढ–मुग्लिन सडक र पृथ्वी राजमार्ग अवरुद्ध भएको छ ।

नारायणगढ मुग्लिन सडकको जलविरे र घुमाउनेमा पहिरो खसेपछि आज बिहान ६ बजेदेखि सडक अवरुद्ध भएको हो ।

इच्छाकामना गाउँपालिका–६ जलविरेमा र भरतपुर महानगरपालिका–२९ स्थित घुमाउनेमा चार दिनयता पहिरो खस्दा सडक आवागमन प्रभावित हुँदै आएको छ ।

यता, लगातारको वर्षाका कारण पृथ्वी राजमार्गको मुग्लिन नौबिसे सडकखण्डअन्तर्गतको फिस्लिङमा आज बिहान पहिरो खसेको छ । पहिरो खस्दा सडक अवरुद्ध भएको छ ।

६ः४५ बजेतिर खसेको पहिरो पन्छाउन पानी परिरहेकाले कठिन भएको प्रहरीले जनाएको छ ।