बंगलादेशमा एमबिबिएस अध्ययनरत नेपाली विद्यार्थीले आत्महत्या गरे

काठमाडौं । बंगलादेशमा एमबिबिएस अध्ययनरत एक नेपाली विद्यार्थीले आत्महत्या गरेका छन् ।

एमबिबिएसको पढाइ सकेर एक साताअघि मात्र इन्टर्सिप सुरु गरेका राजिव श्रीवास्तवले बुधबार आत्महत्या गरेका हुन् ।

उनले ढाकास्थित कम्युनिटी बेस्ड मेडिकल कलेजमा एमबिबिएस अध्ययन गरेका थिए । पढाइ सकेपछि हालै मात्र अस्पतालमा इन्टनसिप गर्न सुरु गरेका उनले कलेजका प्रिन्सिपलसँगको विवादका कारण आत्महत्या गरेको खबर बाहिर आइरहेको छ । बंगलादेश प्रहरीले भने आत्महत्याको कारणबारे अनुसन्धान भइरहेको जनाएको छ ।

कलेजले उनीसँग अतिरिक्त शुल्क माग गरेपछि विवाद बढेको त्यहाँ अध्ययनरत एक नेपाली विद्यार्थीले जनाएका छन् ।

श्रीवास्तवले आत्महत्या गरेपछि कलेजका प्रिन्सिपल मिर्जा मन्जुरुल हकले ’आत्महत्या सामान्य कुरा हो’ भनेपछि नेपालीसहित बंगलादेशी विद्यार्थी आक्रोशित बनेका छन् ।

नेपाली विद्यार्थीका अनुसार श्रीबास्तावले होस्टलको कोठामा बुधबार बिहान साढे ११ बजे झुन्डिएर आत्महत्या गरेका हुन् । उनीसँगै रहेका साथी बाहिर गएको समयमा उनले आत्महत्या गरेका हुन् ।

उनको बिहीबार मेमेनसिङ मेडिकल कलेजको शिक्षण अस्पतालमा पोस्टमार्टम भएको बताइएको छ ।