पासाङल्हामु सडक पहिरोले अवरुद्ध

नुवाकोट । पासाङल्हामु सकडको त्रिशूली बेत्रावती खण्डको तिरतिरे भिरमा मंगलबार पहिरो जाँदा सडक अवरुद्ध भएको छ ।

यहाँको विदुर नगरपालिका–१० को तिरतिरे भिरमा मंगलबार बिहान १०ः३० बजे बजेतिर पहिरो गएपछि सडक बन्द भएको हो ।

५० मिटर माथिबाट आएको पहिरोले करीब १० मिटर सडक पुरेको छ । पहिरो खसिरहेकाले तत्काल हटाउन नसकिएको जिल्ला प्रहरी कार्यालयले जनाएको छ ।

पहिरोका कारण काठमाडौँबाट रसुवाका लागि हिँडेको र रसुवाबाट काठमाडौँका लागि हिँडेका सवारीसाधन रोकिएको छ ।

रसुवा जानका लागि वैकल्पिक सडक त्रिशूलीबाट तुप्चे हुँदै मनकामनाबाट पैरेबेसी तरेर जान सकिने सडकसमेत मनकामनामा पहिरोले भत्काएर कारण सवारी साधन नुवाकोटमै अलपत्र परेको हो । गल्छी–त्रिशूली–मैलुङ–स्याफ्रुबेसी सडक योजनाले सडक स्तरोन्नतिका क्रममा कटिङ गरेको सडकमा पहिरो गएको हो । पहिरो खुलाउन दुई दिनसम्म लाग्ने प्रहरीले जनाएको छ ।