माइक्रो र कन्टेनर ठोकिँदा १ मृत्यु १५ जना घाइते

तनहुँ । पृथ्वीराजमार्गस्थित व्यास १२ छिर्कनमा सोमबार बिहान माइक्रोबस र कन्टेनर एकआपसमा ठोक्किदा एक जना यात्रुको मृत्यु भएको छ ।

दमौलीबाट डुम्रेतर्फ जाँदै गरेको बा२ ख१८३८ नम्बरको माइक्रोबस र विपरित दिशाबाट आउँदै गरेको बा४ ख११२४ नम्बरका कन्टेनर एक आपसमा ठोकिँदा दुर्घटना भएको प्रहरीले जनाएको छ ।

माइक्रोमा सवार भोजपुर बोक्सीङ्ग नगरपालिका ६ की १९ वर्षिय सविना राई घाइते भएका थिए । उनको पोखरास्थित मणिपाल शिक्षण अस्पतालमा उपचारका क्रममा मृत्यु भएको बताइएको छ ।

सोही दुर्घटनामा पुरी १५ जना यात्रु घाइते भएका छन् । घाइते मध्ये ४ जनाको पोखराका विभिन्न अस्पतालमा उपचार भइरहेको छ भने अन्य घाइते दमौलीस्थित रत्नहरि अस्पतालमा उपचारपछि घर फर्केका छन् । माइक्रोबस चालकलाई प्रहरीले नियन्त्रणमा लिएको छ भने कन्टेनर चालक फरार रहेका छन् ।