लगातारका वर्षाले गैडाकोट बजार क्षेत्र जलमग्न

नवलपुर । नवलपरासीपूर्वको गैंडाकोट नगरपालिकामा मुख्य बजार क्षेत्रमा पानीको निकास नहुँदा यो वर्ष पनि जलमग्न भएको छ ।

बुधबारदेखि परेको वर्षाले गैंडाकोट नगरपालिकाको वडा नम्बर २, वडा नम्बर ४ झपर्दी क्षेत्र, वडा नम्बर ९ को राजमार्गको उत्तरतर्फको क्षेत्र पानीले तालाताल छ । गैंडाकोट नगरपालिकाको वडा नम्बर ५, ६ र ७ का केही स्थानहरुमा पानीले निकास नपाउँदा जलमग्न भएको छ ।

नगरपालिकाको मापदण्डअनुसार बाटो तथा नाली निर्माणको काम नगरिँदा वर्षेनि समस्या बन्दै गएको छ । ठाउँ ठाउँमा बनाइएका प्लटिङमा मापदण्डअनुसारका बाटो र ढल निकास तथा नाली निर्माणको काम हुन सकेको छैन ।

गत वर्षको वर्षामा पनि गैंडाकोट नगरपालिकाको राजमार्ग आसपासको मुख्य बजार क्षेत्र डुबानमा परेको थियो । पानीको निकास नहुँदा गत वर्ष हप्तौंसम्म गैंडाकोटमा डुबानमा परेको थियो ।

बुटवल–नारायणघाट सडक खण्डको सडक विस्तारका लागि निर्माणाधिन बाटोमै खनेर हप्तौंपछि पानीको निकास गरिएको थियो । नगरपालिकाका जनप्रतिनिधिहरुले यो समस्या तत्कालै समाधान हुने बताए पनि दीर्घकालिन योजना बन्न नसक्दा यो वर्ष पनि समस्या उस्तै देखिएको छ ।

नारायणी नदी किनारमै जिल्लाको पुरानो नगरपालिका भएर पनि ब्यवस्थित हुन नसक्दा समस्या देखिएको छ । नगरपालिका क्षेत्रमा कालोपत्रे गरिँदा मापदण्ड पुग्न नसकेकै कारण पनि वर्षेनि पानीले निकास पाउन सकेको छैन ।