पहिरोमा परी तनहुँमा २ जनाको मृत्यु, ३ जना घाइते

तनहुँ । गए रातीदेखि परेको अविरल वर्षाले आएको पहिरोले तनहुँको बन्दीपुर गाउँपालिका–३ तामुङमा २ जनाको मृत्यु भएको छ भने ३ जना घाइते भएका छन् ।

पहिरोबाट तामुङका करिब ३० वर्षीया सरस्वती थापा र ७० वर्षीया हरिमाया बसेलको निधन भएको हो । उनीहरूको घटनास्थलमै मृत्यु भएको वडासदस्य हर्कबहादुर थापाले जानकारी दिए ।

पहिरोमा परी ३ जना घाइते भएका छन् घाइतेमध्ये एक जनाको अवस्था गम्भीर रहेको प्रहरीले जनाएको छ । सरस्वतीका ससुरा दिलबहादुर मगर, सासू दाउरीमाया मगर र देवर सुवास थापा घाइते भएका छन् ।

पहिरोका कारण चार घर जोखिममा रहेको छ । पहिरोले घर पुरेको गाउँपालिकाका उपप्रमुख करुणा गुरुङले जानकारी दिइन् । घटनास्थल जाने बाटोहरु पहिरोले अवरुद्ध भएका छन् ।