पोखरीमा डुबेर एकको निधन

भक्तपुर । मध्यपुरथिमि नगरपालिका–४ स्थित विष्णु कुण्डलमा डुबेर एकको मृत्यु भएको छ ।

सिन्धुपाल्चोक बराम्ची–३ घर भई हाल मध्यपुर थिमि बस्दै आएका १७ वर्षीय विवेक अधिकारीको आइतबार मृत्यु भएको महानगरीय प्रहरी वृत्त थिमिका प्रमुख एवं प्रहरी नायब उपरीक्षक मिलन केसीले जानकारी दिए ।

अपराह्न करीब ५(६ बजे साथीहरुसँग विष्णु कुण्डलमा पौडी खेल्ने क्रममा पोखरीको पर्खालबाट घोप्टिएर पोखरीमा पस्दा पोखरी भित्रको हिलोमा भासिएर मृत्यु भएको प्रारम्भिक अनुसन्धानबाट खुलेको बताए । घटनाबारे जानकारी पाएलगत्तै उद्धारका लागि खटिएको थिमिको प्रहरी टोलीले पोखरीभित्र पसेर शव निकालेको थियो ।

शव परीक्षणका लागि शिक्षण अस्पताल महाराजगञ्ज पठाइएको छ । मध्यपुर थिमि नगरपालिकाले यसवर्ष मात्रै १० लाख खर्च गरेर उक्त धार्मिक पोखरीको सरसफाइ गरी पर्खाल लगाएको थियो ।