मोरङका छुट्टाछुट्टै सवारी दुर्घटनामा २ को मृत्यु

मोरङ । उर्लाबारीको २ छुट्टाछुट्टै स्थानमा मंगलबार भएका सवारी दुर्घटनामा २ जनाको मृत्यु भएको छ ।

बूढीगंगा गाउँपालिका-३ स्थित कोशी राजमार्गमा मंगलबार दिउँसो बसको ठक्करबाट १ साइकलयात्री वृद्धको मृत्यु भएको छ । विराटनगरबाट यात्रु लिएर उदयपुरतर्फ जाँदै गरेको ना५ख ५००८ नंको बसले ठक्कर दिँदा बूढीगंगा-३ का ६५ वर्षीय विर्खबहादुर कार्कीको मृत्यु भएको जिल्ला ट्राफिक प्रहरी कार्यालय, मोरङले जनाएको छ । सप्तरीको सप्तकोसी नगरपालिका-१ का इलाका प्रहरी कार्यालय निमुवाले चालकलाई नियन्त्रणमा लिएको छ ।

त्यसैगरी, रतुवामाई नगरपालिका-५ मा मंगलबार को२त ८११५ नंको ट्र्याक्टरले किचेर १ बालकको मृत्यु भएको छ । मनोज माझीको ४ वर्षीय छोरा बादल माझीको मृत्यु भएको हो । बाबुले खेत जोत्नका लागि ट्र्याक्टर लैजाने क्रममा सोही ट्र्याक्टरमा बसेका बादल अचानक तल खसेको र पछाडिको चक्काले किच्दा उनको घटनास्थलमा नै मृत्यु भएको इलाका प्रहरी कार्यालय सिजुवाका प्रहरी निरीक्षक मानप्रसाद श्रेष्ठले जानकारी दिए । घटनापश्चात् बाबु फरार रहेकाले खोजी भइरहेको प्रहरीले जनाएको छ ।