जडिबुटीमा ट्रिपरको ठक्करबाट १ को मृत्यु

काठमाडौं । मंगलबार दिउँसो साढे १ बजे कोटेश्वरको जडिबुटीमा ट्रिपरले मोटरसाइकलाई ठक्कर दिँदा झापा बिर्तामोडका १८ वर्षीय रोयल सुवेदीको मृत्यु भएको छ । सुवेदी मोटरसाइकल पछाडि सवार थिए ।

मोटरसाइकल चालक भक्तपुर सल्लाघारीका १८ वर्षीय अमन ढुंगेल घाइते भएका छन् । घाइते अमनको एउटा खुट्टा भाँचिएको छ । उनको वीर अस्पताल नजिक रहेको ट्रमा सेन्टरमा उपचार भइरहेको जनाइएको छ ।

प्रत्यक्षदर्शीका अनुसार जेब्रा क्रसिङमा रोकिराखेको बा ७५ प ७१६ नम्बरको जिक्सर मोटरसाइकललाई बा ४ ख ८७२५ नम्बरको ट्रिपर पछाडिबाट ठाक्कर दिँदा मोटरसाइकल पछाडि बस्ने रोयलको घटनास्थलमै मृत्यु भएको थियो । 

घटनालगत्तै ट्रिपर चालक हरिशरण राईलाई नियन्त्रणमा लिएको र अनुसन्धान भइरहेको प्रहरी निरीक्षक राजु लामाले बताए । मृतक रोयल कक्षा १२ मा अध्ययनरत छन् । 

घटनालगत्तै आक्रोशित भीडले ट्रिपरमाथि आगजनीको कोशिस भएको र नियन्त्रण गर्ने क्रममा भीडको आक्रमणबाट ४ जना प्रहरी घाइते भएको निरीक्षक लामाको भनाइ छ ।

मृतकको शवलाई टिचिङ अस्पताल महाराजगञ्जमा लगिएको छ ।