शर्मा रोड सेफ्टी मिडिया अवार्डबाट सम्मानित

काठमाडौं । पत्रकार भाषा शर्मा रोड सेफ्टी मिडिया अवार्डबाट सम्मानित भएकी छन् । उनी नागरिक दैनिकमा आवद्ध छन् । 

नेपालको सडक सुरक्षाबारे निरन्तर रुपमा कलम चलाएवापत नेपाल अटोमोबाइल्स एसोसिएसन (नासा) ले शर्मालाई रोड सेफ्टी मिडिया अवार्डबाट सम्मान गरेको हो ।

बेलायतका पूर्व यातायात मन्त्री पाउल क्लार्क, फेडरेसन इन्टरनेसनल डी मोटोसाइक्लिज्म (एफआईएम) का प्रतिनिधि ओमार जारौर, इन्डियन एलाइन्स फर रोड सेफ्टी एनजीओका अध्यक्ष अनुराग कुलश्रेष्ठ, नेसनल रोड सेफ्टी एलाइन्स नेपालका संयोजक तथा सांसद योगेश भट्टराई र नाडा अटोमोबाइल्स एसोसिएसन अफ नेपालका पूर्व अध्यक्ष एवं नेपाल उद्योग वाणिज्य संघका सदस्य सौरभ ज्योति लगायतले सो सम्मानका साथ उनलाई ११ हजार १ सय ११ रुपैयाँ नगदसमेत प्रदान गरे ।

नेपालको सडक सुरक्षामा क्रियाशील नासाले रोड सेफ्टी फोरम नेपाल र स्वतन्त्रता अभियान नेपाल लगायतका संस्थाहरुको सहकार्यमा रोड सेफ्टी मिडिया अवार्ड वितरण गर्दै आइरहेको छ ।