पहिरोका कारण ४ घर विस्थापित

भक्तपुर । पुरी टोलका धर्मराज पुरी, सानुकान्छा पुरी, विश्वनाथ पुरी र कुवेर पुरीको घर समेत ४ घर पहिरोको उच्च जोखिममा परेको छ ।

पहिरो जाँदा पुरीटोलका चारै परिवारको आँगन र घर समेत चिरा परेको छ । पहिरोका कारण कुनै पनि बेला घर भत्किन सक्ने सम्भावना बढेपछि चारै परिवारलाई सुरक्षित बासका लागि नेपाल रेडक्रस सोसाइटी सुडाल उपशाखाको पहलमा जिल्ला शाखाले टेन्ट उपलब्ध गराएको छ ।

पहिरोका कारण घर र आँगनमा चिराचिरा परेपछि प्रति परिवार एकएक वटा टेण्ट उपलब्ध गराइएको उपशाखाका सभापति विदुर नेपालले जानकारी दिए ।

च्याम्हसिंह सुडाल सडकको ट्रयाक खन्ने क्रममा बनेको डिलमा पहिरो गएका कारण पुरी टोलका चारै परिवारको घर जोखिममा परेको पीडित धर्मराजले बताए ।