ट्र्याक्टरको ठक्करबाट मोटरसाइकल चालकको मृत्यु

चितवन । भरतपुरमा ट्र्याक्टरले मोटरसाइकललाई ठक्कर दिँदा बिहिबार बिहान १ जनाको मृत्यु भएको छ ।

भरतपुर महानगरपालिका–१० सिनर्जी चोकमा वीरेन्द्र क्याम्पस चोकबाट विकास चोकतर्फ जाँदै गरेको महानगरको फोहर उठाउने ना२ त३६६१ नंको ट्र्याक्टर र पश्चिमतर्फ शान्ति मार्गबाट आइरहेको ना५३ प९७८६ नंको मोटरसाइकल एकापसमा ठोक्किएपछि मोटरसाइकल चालक भरतपुर महानगरपालिका–१४ बस्ने १८ वर्षीय पारस खत्रीको मृत्यु, नवलपुर गैँडाकोट–७ बस्ने १९ वर्षीय सुरज परियार घाइते भएका छन् ।

जिल्ला प्रहरी कार्यालय चितवनले दिएको जानकारीअनुसार मोटरसाइकल सडकमा निस्किने क्रममा ट्र्याक्टरमा ठोक्किदा दुर्घटना भएको हो । खत्रीको चितवन मेडीकल कलेजमा उपचारका क्रममा मृत्यु भएको प्रहरीले जनाएको छ ।

घाइते परियारको चितवन मेडिकल कलेजमा उपचार भइरहेको छ । परियारको अवस्था मध्यम रहेको प्रहरीले जनाएको छ ।