आँधी र बाढीका कारण ठूलो जनधनको क्षति, २१ जनाको मृत्यु, ४ हजार घर भत्किए

काठमाडौं । भियतनाममा भारी वर्षापछि आएको बाढी र आँधीका कारण ठूलो जनधनको क्षति भएको सरकारी अधिकारीहरुले बताएका छन् ।

बाढीमा परी कम्तीमा २१ जनाको मृत्यु भएको र आँधीका कारण कैयौं व्यक्ति हराइरहेको सरकारी अधिकारीलाई उद्धृत गर्दै फ्रान्सेली समाचार एजेन्सी एएफपीले जनाएको छ ।

दक्षिण पश्चिमी एसियाली राष्ट्र भियतनाममा मौसमी बर्षा र आँधीमा परी बर्षेनी सयौं व्यक्तिको मृत्यु हुने गरेको छ । भियतनाममा यस वर्षको सुरुदेखि हालसम्म आएको यो तेस्रो पटकको आँधी हो । बुधबारबाट आएको पछिल्लो आँधीको नाम ‘सन टिन्ह’ रहेको बताइएको छ ।

भारी वर्षाका कारण राजधानी हनोईसहित देशका सबै क्षेत्रमा बाढी आएको छ । साथमा आँधी पनि आएको छ । जसका कारण उद्धारको काम हुन सकिरहेको छैन । प्राप्त पछिल्लो विवरणअनुसार उत्तरी पहाडी प्रान्त येन बाई र तान्ह होआमा प्रकोपले बढी क्षति पुर्याएको छ ।

हाल जारी प्रकोपका कारण करिब ४ हजार घर भत्किएका छन् भने हजारौं हेक्टर खेती लगाएको जमीनमा क्षति पुगेको छ । भियतनामका मौसमविदले अझै केही दिन भारी वर्षा हुने अनुमान गरेको छ । गत वर्ष पनि भियतनाममा प्राकृतिक प्रकोपका कारण ३ सय ८९ व्यक्तिको मृत्यु भएको थियो ।