स्कूल बस दुर्घटनामा ६५ विद्यार्थी घाइते

भक्तपुर । मध्यपुरथिमि–९ नीलबाराहीमा स्कूलबस दुर्घटना हुँदा ६५ विद्यार्थी घाइते भएका छन् ।

काठमाडौंको मूलपानीस्थित क्रिश्चियन कम्युनिटी स्कूलबाट विद्यार्थी लिएर भक्तपुरको थिमितर्फ आउँदै गरेको बा२ क९२५० नं को स्कूल बस बिहीबार  दुर्घटना भएको हो ।

घाइते विद्यार्थिमध्ये ४१ जनाको मध्यपुर अस्पताल र २४ जनाको गठ्ठाघरस्थित नागरिक कम्युनिटी अस्पताल र गम्भीर घाइते ४ वर्षीया प्रतीज्ञा श्रेष्ठलाई काठमाडौँ मेडिकल कलेज पठाएको अस्पतालका निर्देशक जितेन्द्र श्रेष्ठले जानकारी दिए ।

बसका सहचालक २८ वर्षीय अनिल थापाको नागरिक अस्पतालमा उपचार हुन नसकेपछि बाँसबारीस्थित न्यूरो अस्पतालमा पठाएको छ । थापाको अवस्था गम्भीर रहेका श्रेष्ठले जानकारी दिए ।

सडकमा अर्को गाडीलाई ठाउँ दिने क्रममा बसले पछाडि हटाउँदा सडकबाट १५ फिट तल खसेको महानगरीय प्रहरी वृत्त थिमीका प्रहरी नायब उपरीक्षक मनोज केसीले जानकारी दिए ।

विद्यालयकी प्रिन्सिपल लालिमा मालाकारले दुर्घटनाप्रति दुःख व्यक्त गर्दै विद्यार्थीको उपचारमा लाग्ने सम्पूर्ण खर्च विद्यालयले व्यहोर्ने बताए ।