नेपालको समृद्धिमा जर्मनी सँधै साथमाः राजदुत सेफर

काठमाडौँ । नेपालका लागि संघीय गणतन्त्र जर्मनीका राजदूत रोलाण्ड सेफरले नेपाल सरकारको रणनीतिक लक्ष्य ‘समृद्ध नेपाल, सुखी नेपाली’ हासिल गर्ने अभियानमा आफ्नो देशको पूरा साथ रहने बताए ।

नेपाल चेम्बर अफ कमर्शले आज यहाँ आयोजना गरेको ‘नेपाल–जर्मन दुई पक्षीय व्यापार तथा लगानी’ विषयक अन्तरक्रियालाई सम्बोधन गर्दै उनले समृद्धिका लागि क्षमता अभिवृद्धि महत्वपूर्ण हुने उल्लेख गरे ।

उनले नेपाली व्यापार–व्यवसायको प्रवद्र्धनका लागि नेपाली व्यापारिक समुदायको क्षमता अभिवृद्धिका लागि तालीममा सहयोग गर्न सकिने बताउँदै व्यापारबाटै संसारका देशहरुले समृद्धिको सपना पूरा गरेकाले नेपाल पनि सोही बाटोमा हिँड्नुपर्ने बताए ।

नेपाल चेम्बर अफ कमर्शका अध्यक्ष राजेशकाजी श्रेष्ठले वर्तमान सरकारको लक्ष्य पनि अत्यधिक वैदेशिक लगानी ल्याएर नेपाललाई समृद्ध पार्ने रहेकाले जर्मन लगानीको उपयुक्त वातावरण बनेको बताएकोे चेम्बरले उल्लेख गरेको छ ।