एक किलो सुनसहित दुईजना पक्राउ

काठमाडौं । तेत्तिस किलो सुन प्रकरणले बजार तातिरहेका बेला सुन तस्करी भने रोकिने छाँटकाँट देखिँदैन । केहीदिन अघिमात्रै नागढुंगाबाट ६ किलो अवैध सुन बरामद गरेको प्रहरीले आइतबार पनि एक केजी सुनसहित अन्तर्राष्ट्रिय विमानस्थलबाट दुई जनालाई पक्राउ गरेको जनाएको छ ।

महानगरीय प्रहरी परिसर काठमाडौंले अवैध रुपमा सुन तस्कर गरेको आरोपमा दुई जनालाई पक्राउ गरी आज सार्वजनिक गरेको हो ।

परिसरको टोलीले वैदेशिक रोजगारीका सिलसिलामा भन्सार छलेर सुन ल्याउँदै गरेका अवस्थामा धनुषाका ५० वर्षीय रामसुगारत यादव र काभ्रेपलाञ्चोकका ३२ वर्षीय पाल्देन लामालाई आइतबार पक्राउ गरेको थियो ।

परिसरका प्रवक्ता मोहनकुमार थापाले अभियुक्त यादवसँग रु चार लाख ८७ हजार ९४५ बराबरको ९९।५ ग्राम सुन र लामासँग रु चार लाख ८८ हजार बराबरको १०० ग्राम सुन बरामद गरिएको जानकारी दिए । अभियुक्त दुवै जनालाई आवश्यक कारवाहीका लागि त्रिभुवन विमानस्थल भन्सार कार्यालय पठाइएको प्रवक्ता थापाले बताए ।