सप्तकोशीमा पानीको बहाव बढेपछि सन्त्रास, २९ वटा ढोका खोलियो

इनरुवा । सप्तकोशी नदीमा पानीको बहाव बढेपछि तटीय क्षेत्रमा सन्त्रास छाएको छ । पानीको बहाव बढेसँगै केशी ब्यारेजको ५२ वटा ढोकामध्ये २९ वटा ढोका खुल्ला गरिएको छ ।

पूर्वी पहाडी क्षेत्रमा लगातार परेको वर्षाका कारण कोशीमा पानीको मापन खतराको संकेत माथि पुगेको छ ।

शनिबार राति ९ः१५ बजे गरिएको मापनअनुसार कोशी ब्यारेज भएर जाने पानीको बहाव दुई लाख १५ हजार ९७० क्युसेक प्रतिसेकेण्ड पुगेपछि केशी ब्यारेजको २९ वटा ढोका खुल्ला गरिएको र ब्यारेजमा खतराको संकेतस्वरुप रातो बत्ती बालिएको प्रहरी नायब उपरीक्षक नारायणप्रसाद चिमौरियाले जानकारी दिए ।

उक्त ब्यारेजमा पानीको बहाव एक लाख ५० हजार क्युसेक प्रतिसेकेण्डभन्दा माथि पानीको बहाव भएपछि खतराको बत्ती बालिने गरेपनि सुनसरीमा खतराको अवस्था नरहेको प्रमुख जिल्ला अधिकारी प्रेमप्रकाश उप्रेतीले बताए ।